I piu belli paesi di Corsica : Rutali, in un nidu di virdura

Dapoi 1970, u paese vechju cun case appicciate s’hè allargatu cun case isulate. A merria è a scola sò vicine è a chjesa San Vitu di bellu stile baroccu. Piazza di l’Orticiò è quella di l’Olmu (o u Furnichjulu) sò circundate da e strette di Calabraca, di e Loghje è a Traversa. I tetti di u paese vechju per u più sò cuperti di teghje ma per e case nove sò in teculi. U paese hè pupulatu da trecentu ottanta abitenti duppiatu in estate. Turrenu cun San Parteu, u Loru cun San Sari sò lochi abitati da l’antichità è u mediuevu. Duie antiche ferrere à u Bivincu, mulini, pagliaghji, aghje testimunieghjanu d’anziane attività. U ponte à Turrenu sopr’à Bivincu data di u Mediuevu. A Madonna di e Piane in 2003 hà rimpiazzatu quella di 1951 tocca da a saetta
U 15 ghjugnu hè festa paruchjale di San Vitu martire. U 12 d’agostu Santa Chjara. Da stu locu è a Turricella accantu, a vista hè splendida. U 16 agostu, ci hè dinù a prucessiò di San Roccu.
Frà i Rutalacci celebri, u canonicu Petru Rutali chì lasciò i so lochi per Santa Catalina di l’Ortale è San Vitu in 1723, u so fratellu Francescu Maria culunnellu à u serviziu di Venezia in Dalmazia versu 1690/1710, u ministru André Maroselli sott’à a IVa republica, u generale Pierre-Louis Tasei in tempu di u presidente De Gaulle, Allée Prete Casta curatu di Rutali da 1907 fin’à 1931, i resistenti di a 2da guerra mundiale JB Bastelica è Jean Albertini. U stadiu ramenta Henri Santelli maestru.
Prete Flori (1907-1994) hè rinumatu da storicu, giurnalistu è pueta. Altri pueti : Antone Flori (1913-1981) è u so figliolu Ghjuvan Paulu, Ghjuvan Battistu Giacomoni è Anghjulu Salducci. Serge Venturini filosufu è pueta francese. Frédéric Cathala, rumanzieru. Antoine-Marie Graziani storicu è Vladimir Biaggi filosofu è autore in parechji genari, anu radiche rutalacce.