Corti : Umagiu sinceru à Edmond Simeoni

Trè mesi fà, si spense Edmond Simeoni. Omu d'influenza pulitica pupulare è di pace militante era dinò un omu d'avanguardia. Babbu di a patria oghjinca per certi, avarà lasciatu in ogni mente, una stampa irrimuvevula.

Per rendeli un umagiu particulare, l'università di Corsica hà invitatu tutti quelli chì vulianu participà, à una serata di memoria.

Jacques Thiers, Andria Fazi, Jacqueline Bosseur-Acquaviva è altri intervinente, anu pigliatu à tornu a parola per ramintà qual'era Edmond Simeoni.

1975, Aleria, prima vera azzione putente di lotta è di ribellione di pettu à u statu francese. Imprigiunamentu è à a so surtita, criazione di L'Unione di u Populu Corsu. Criazione di u FLNC, quella di l'Assemblea di Corsica in 1982, è 33 anni dopu, l'intrata in maiurità di i naziunalisti.

"Una legende per ogni militantu di a so famiglia pulitica mentre un mezu seculu" dicerà Andria Fazi.

A so battaglia dinò per l'università di Corsica, per a so lingua è a so cultura.

"Ghjera un amicu, à sensu pienu. Una persona ch'avia amicizia per l'umanità. Ùn l'aghju mai vistu una mischineria. Un affaru tremendu dinò, un l'aghju mai vistu un oncia di viulenza. Ghjera per a pace, per u discorsu. Grazie o Edmond, per mè è per ciò c'hè no simu. Chì s'aghju scupertu a ricchezza di a mo lingua è di a mo cultura è grazi'à ellu" affideghje Jacques Thiers.

" Mossa pulitica di l'annata sessanta, frà altri cumbatti, c'era a criazione di l'università di Corsica. Ghjera per Edmond l'istituzione è l'emancipazione di a cunniscenza per a Corsica" pricizarà dinò Alain di Meglio.

Nanzu di lascià a piazza à i canti è puesie, Max Simeoni, u so fratellu, hà compiu issu mumentu di spartera. " A ringraziavvi d'esse quì. [...] Vogliu mette l'accentu annant'à calcosa chì mi pare forte ! Cum’aghju perpiciputu u viotu di a Corsica quandu vultava in vacanze mentre i mo studii. Era atteritu. [...]. Aghju cuminciatu à milità è fundatu i primi muvimenti. Edmond, quand'ellu pudia, vinia dinò ma ci punia digià prublemi, chì era talmentu impitosu. Era apartu à tuttu è stacciaminà tuttu".

Un umagiu resu in prisenza di a sa famiglia è amichi è chì s'hè compiu in Giru à unu spuntinu.