Felì è Canta u Populu Corsu in "campagna canterina"

- Comu hè natu issu prughjettu ?
Ceccè Buteau : Hè natu d’una chjama di Felì. Vulia fà una serata cù a so scola di cantu l’annu scorsu. Avemu rispostu di sì, cùn piacè. Masimu chè a so andatura intornu à l’amparera di u cantu è di a lingua corsa ci piace monda. Avemu fattu una serata chì fù, da veru, una maraviglia. Un piacè tamantu. Ci vulia à fà qualcosa per cuntinuà. Tandu, hè natu « Ch’ellu canti u populu corsu ».

Felì : Sò natu à mezu à e canzone è u travagliu di Canta u Populu Corsu. À un mumentu datu, u tintu Natale Luciani m’avia prupostu di entre in u gruppu ma era digià cù i Surghjenti. Natale mi chjamava à l’epica u « Benjamin » di u Riacquistu. `Simu tutti nati cù Canta u Populu Corsu, ci era una mossa. Per ciò chì tocca à u prughjettu, aghju vistu chè i ghjovani di u gruppu cantavanu e mo canzone. È l’affare di cantà inseme hè ghjunta guasi naturale. Avemu fattu a famosa canzona è uni pochi di cuncerti daretu. Ghjè per quessu ch’è noi vulemu fà issa seguita in Bastia è Aiacciu.

- Chì serà u cuntinutu di issi cuncerti ?
C.B : Avemu fattu una prima scelta di e canzone. È dopu à una prima lista, ci n’era ottanta ! Facia un cuncertu di dece ore ! Avemu tagliatu ma u cuncertu hà durà à pocu pressu duie ore è mezu. Ci seranu canzone di Felì, solu o accumagnate da e voce di Canta u Populu Corsu. Eppo, d’un altra parte, e canzone di Felì ch’è noi canteremu noi.
F : Avemu da fà ciò ch’è noi femu quand’è noi simu inseme. Lascemu quantunque un pocu a surpresa à u publicu pè a scelta di i canti…À maiò parte di u tempu, canteremu inseme.

- Chì saria a canzona di l’altru (Canta o Felì) chì vi piace u più?
C.B : A canzona di Felì chì ci face passà un’emuzione particulare? Ci n’hè monda ma quella chì mi piace u più hè « Golu ».
F : Hè assai difficiule di sceglie una canzona trà tutte quelle chì sò state scritte dapoi quarant’anni. Mi campu à cantà « In memoria » ma dinò Compagnero, Ci hè Dinò, Allegria…U repertoriu hè abbastanza largu.

- Ver di un dischettu inseme ?
C/B : perchè micca ? Tuttu hè pussibile. Hè un piacè di travaglià inseme.
F : A simbolica di a canzona « Ch’ellu canti u Populu Corsu » ci porta, forse, ver d’altri orizonti. Quale hè chì sà ?

V’aspettaiate à tamantu successu per issa canzona ?
C.B : Ùn s’aspetta mai un successu quandu si face una canzona. L’affare sò ghjunte di manera naturale.
F : In u primu cuncertu ch’aviamu fattu in Fulelli, avia digià appena u versu in capu. U fattu hè chè a canzona hà toccu u publicu. S’ellu ci hè un successu, saria quessu quì.

L’avvene di a vostra struttura ?
C.B : Hè l’avvene chì l’hà da dì. A nostra andatura, quella di sempre, hè d’esse militanti di a nostra lingua, a nostra cultura è a nostra terra. Mustrà chè a lingua hè capace di porghje sughjetti d’attualità. Travagliemu à nantu à què. Quandu hà da sorte un resultatu in dischettu, ùn la sò à dilla franca.
F : Ci sò parechji prughjetti. U primu serà un dischettu pè i zitelli, appena a seguita di « Girasole » cù u scopu di entre in tutte e scole è di dà materia à i stututori per ch’elli possenu travaglià. Dopu, mi piacerebbe, è ghjè un prughjettu di dui o trè anni, di registrà dinò tutte e canzone chè n’avemu fattu cù Ghjuvan Teramu Rocchi.

Infos billetterie: corsebillets.com